14 leşekrên Îranê li ser sînor hatin revandin

Li ser sînorê Îranê û Pakistanê îro Sêşembî 16ê Cotmeha 2018ê 14 kes ji hêzên Îranê ji aliyê gtûpeke çekdar ve hatin revandin.
16.10.2018, Sal - 12:13
14 leşekrên Îranê li ser sînor hatin revandin
Nuçe Belav bike

Li gorî nûçeya ajansa fermî ya dewleta Îranê IRNAyê, îro li sînorê qezaya Mîrcawê ya ser bi parêzgeha Sîstan û Belûçistanê 14 kes ji endamên hêza Besîc û hêzên pasevaniya sînor ji aliyê rêxistina Ceyş El-Edl ve hatine revandin.

IRNAyê hûrgiliyên wê bûyerê aşkere nekiriye, lê belê malpera Yaneya Nûçegihanên Ciwan ragihandiye, ku 7 kes ji wan hêzên revandî endamên xwecihî yên Besîcê, 5 ji wan endamên hêzên pasevaniya sînor û 2 kes jî endamên Îtilaata Supaya Pasdaran a Îranê ne.

Herwiha malperekî nêzîk ji Supaya Pasdaran ragihandiye, bûyer îro derdora saet 04:00ê serê sibê û li sînorê qezaya Mîrcawê li başûrê parêzgeha Sîstan û Belûçistanê çê bûye û di bûyerê de hejmarek ji endamên Besîc û hêzên pasevaniya sînor ji aliyê endamên komeke çekdar ve hatine revandin.

Li gorî agahiyan, bûyer li devera Rîg Melek li ser sînorê Îran û Pakistanê û bi dûriya 40 km ji navenda qezaya Mîrcawê çêbûye.

Rêxistina Ceyş El-Edl anku Artêşa Dadê ku xwe weke rêxistineke berevanîkar a xelkê Belûçistanê dide naskirin, dema çend salan e ku bo azadî û mafê xelkê Belûçistanê çalakiyan dike, berpirsatiya revandina serbazên îranî li xwe girtiye û ragihandiye, îro Sêşemî (16-10-2018) çekdarên wan êrişî ser binkeyeke Supaya Pasdaran li nêzîkî Mîrcawê kirine û hemû hêzên wê binkeya serbazî ya Îranê girtine.

Nerina Azad
Vî nûçeyê tevayî: 700 kes dît.
Rojanekirina Dawî:10:57:07